Boris Johnson, forsætisráðherra Bretlands, vill þyngja refsingar fyrir alvarleg afbrot á borð við ofbeldi og morð. Kynferðisbrot falla undir þessa flokka. Hann hefur beðið um að farið verði yfir þessi mál og kannað hvort raunhæft sé að þyngja refsingarnar. Johnson segir að traust borgaranna á réttarkerfinu sé háð því að refsingar séu í samræmi við alvarleika afbrotanna.

Í yfirlýsingu frá honum segir að allir hafi séð dæmi um að nauðgarar og morðingjar hafi sloppið alltof fljótt úr fangelsi eða að fólk hafi brotið af sér á nýjan leik um leið og það losnaði úr fangelsi. Nú verði þetta stoppað. Það eigi að handtaka þetta fólk, loka það inni og endurhæfa almennilega.

Johnson hefur á stefnuskrá sinni að efla ýmislegt innanlands, þar á meðal hefur hann heitið að fjölga lögreglumönnum um 20.000. Á sunnudaginn tilkynnti hann að fangelsisplássum verði fjölgað um 10.000 og að lögreglan muni fá auknar heimildir til að stöðva fólk og leita á því.