Af hverju var Jeffrey Epstein ekki gætt betur? Þetta er stóra spurning í Bandaríkjunum þessa stundina eftir að milljarðamæringurinn fannst látinn í fangaklefa sínum í New York um helgina. Hann sat í varðhaldi vegna rannsóknar á meintu barnaníði hans og mansali. Hann átti 45 ára fangelsi yfir höfði sér. Epstein var ekki hver sem er því hann þekkti marga áhrifamestu menn Bandaríkjanna og í tengslum við rannsókn á máli hans hefur því verið fleygt að sumir af þessum áhrifamönnum hafi vitað af gjörðum Epstein og jafnvel tekið þátt í hluta þeirra.

Samsæriskenningar voru fljótar að fara á kreik eftir dauða Epstein og ein sú vinsælasta bendlar Bill Clinton, fyrrum forseta, við dauða hans. Aðrar ganga út á að valdamiklir stjórnmálamenn og aðrir þekktir einstaklingar hafi tengst því sem Epstein var sakaður um. Auk Clinton þekkti Epstein meðal annars Donald Trump, núverandi Bandaríkjaforseta, og Andrew Bretaprins.

Donald Trump reyndi að notfæra sér málið og deildi Twitterfærslu frá hægrisinnaða grínistanum Terrence Williams:

„Jeffrey bjó yfir upplýsingum um Bill Clinton og nú er hann dáinn. Jahérna, hvernig gat það gerst.“

Skrifaði Williams.

Mikið hefur verið fjallað um málið á stóru bandarísku sjónvarpsstöðvunum og á sumum þeirra hafa heimildamenn jafnvel heyrst segja að það sé eitthvað bogið við andlát Epstein.

Epstein reyndi að fyrirfara sér í síðasta mánuði og í kjölfarið var fylgst sérstaklega vel með honum um hríð en því var síðan hætt. Það hefur vakið upp áleitnar spurningar því Epstein var fyrirlitinn af almenningi vegna meintra brota sinna. Auk þess voru margir valdamiklir áhrifamenn á móti honum vegna vitneskju hans um þá. Margir höfðu óttast að verða dregnir inn í rannsókn lögreglunnar.

Það mun síðan væntanlega ekki draga úr samsæriskenningum og umræðu um málið að lík Epstein var krufið í gær og gátu réttarmeinafræðingar ekki skorið úr um dánarorsök hans.