Lögreglunni í Aldinborg í Þýskalandi tókst að hafa hendur í hári manns sem hafði látið undir höfuð leggjast að gefa sig fram til afplánunar ellefu mánaða fangelsisdóms.

Maðurinn lagði á flótta á tveimur jafn fljótum þegar lögreglumenn komu á heimili hans og hugðust handtaka hann. Maðurinn, sem ekki er nafngreindur í frétt AP, er sagður hafa stokkið af svölum. Ekki vildi betur til en svo að hann lenti ofan á geitungabúi með þeim afleiðingum að geitungarnir eltu hann og réðust á hann.

Maðurinn reyndi hvað hann gat að forðast geitungana og hljóp út á götu. Lögreglumenn sem hlupu á eftir honum urðu einnig fyrir barðinu á geitungunum. Það var ekki fyrr en maðurinn stakk sér til sunds í uppblásinni sundlaug að geitungarnir drógu sig í hlé.

Eftirleikurinn reyndist tiltölulega auðveldur fyrir lögreglumennina sem handtóku manninn og færðu hann til afplánunar.