Aldraður maður frá Virginia borðaði ekkert í fimm daga samfleytt en hann drakk bara kók. Þetta gerði hann þó af illri nauðsyn. ARLnow greinir frá þessu.
Það var bréfberi sem tók fyrst eftir einhverju furðulegu heima hjá Glenn Smith. Hún tók eftir því að maðurinn hafði ekki tekið bréfin sín upp í einhvern tíma. Hún spurði nágrannana út í málið en enginn þeirra hafði séð hann. Kallað var á lögregluna vegna þessa.
Nágranni Smith segir að lögreglan hafi tjáð honum að Smith hafi dottið þann 29. júlí og ekki getað hreyft sig í kjölfarið. Það eina sem hann komst í voru kókdósir sem lágu nálægt honum á gólfinu.
Svipaður atburður gerðist á sömu slóðum fyrir nokkrum árum samkvæmt manni sem býr á svæðinu. Öldruð kona sem bjó aðeins nokkrum húsum frá Smith datt og lést áður en nokkur manneskja kom til hennar.
Nágrannar Smith hafa ákveðið að gera ráðstafanir þegar Smith kemur heim til sín frá spítalanum. Nágrannarnir ætla að passa upp á að það sé alltaf einhver sem kíkir á hann við og við til að athuga hvort það sé ekki allt í lagi með hann.
