Óvenjulegt mál kom inn á borð norsku lögreglunnar á þriðjudaginn. Þá var henni tilkynnt um konu sem stóð á eyju, sem heitir Furuholmen, og hrópaði á hjálp. Tilkynnandi þorði ekki að koma henni til aðstoðar því hann var ókunnugur á þessum slóðum og þorði því ekki að sigla nærri eyjunni. Lögreglan sendi því bát á staðinn.

Norska ríkisútvarpið skýrir frá þessu. Fram kemur að áður en lögreglan kom á staðinn hafi annar sjómaður verið búinn að bjarga konunni af eyjunni. Lögreglan mætti báti sjómannsins og tók konuna yfir í sinn bát. Hún var síðan flutt til læknisskoðunar. Hún reyndist vera ringluð og þyrst en annars í ágætu ástandi.

Konan sagði lögreglunni að hún hefði verið á ferðalagi en samferðafólk hennar hafi skilið hana eftir á eyjunni eftir að til deilna kom í hópnum. Þar hafði konan, sem er á sextugsaldri, verið í þrjá daga án vatns og matar.

Lögreglan segir að enginn hafi tilkynnt um hvarf konunnar og því var hennar ekki saknað. Lögreglan er nú að rannsaka málið. Ef frásögn konunnar er rétt þá er um refisverðan verknað að ræða.