Frá 2015 hefur Evrópusambandið (ESB) reynt að finna sameiginlega lausn á flóttmanna- og innflytjendavandanum. Meðal þeirra ráða sem gripið var til var að fjölga landamæravörðum aðildarríkjanna og eiga þeir nú að vera 115.000. En það skortir töluvert upp á að þeim fjölda hafi verið náð þrátt fyrir að aðildarríkin segi að svo sé.  Þetta kom nýlega í ljós í svokölluðu álagsprófi sem Frontex, sú stofnun ESB sem fer með mál er varða gæslu á landamærum og við strendur ESB, gerði.

Samkvæmt frétt þýska blaðsins Welt am Sonntag var ætlunin að ríki ESB ættu nú að vera komin með 115.000 landamæraverði sem eiga að sinna eftirliti á ytri landamærum sambandsins næstu árin en 2027 ætlar Frontex að vera með 10.000 landamæraverði á sinni könnu. Blaðið segir að samkvæmt því sem álagsprófið sýndi þá vanti 5.000 landamæraverði upp á þá 115.000 sem nú eiga að vera komnir til starfa. Þetta kom Fabricie Leggeri, forstjóra Frontex, á óvart.

„Við vitum að ríkin hafa á pappírunum skráð 115.000 landamæraverði. En það passar ekki. Þetta kom mér mjög á óvart.“

Sagði hann í samtali við blaðið. Hann sagði að Frontex ætti nú í viðræðum við þau ríki sem ekki hafa jafnmarga landamæraverði og þau segjast vera með en sagði ekki hvaða ríki það eru.

Straumur flóttamanna og innflytjenda til Evrópu hefur minnkað að undanförnu samkvæmt tölum frá Frontex. Á fyrstu fjórum mánuðum ársins komu 24.000 manns yfir ytri landamæri ESB en það er 27% fækkun frá sama tíma á síðasta ári. Flestir komu í gegnum Tyrkland og margir þeirra eru frá Sýrlandi og Afganistan.