Flugfélagið Emirates flýgur áætlunarflug á milli Dubai í Sameinðu arabísku furstadæmunum og Muscat, sem er höfuðborg Óman. Þetta er að sögn CNN ein stysta áætlunarflugleið heims eða aðeins 340 km. En það dugir auðvitað ekkert minna en stærsta farþegaflugvél heims, Airbus A380, til að nota á flugleiðinni.

Flugtíminn er tæplega ein klukkustund. Emirates hefur flogið á þessari leið frá 1993 en svo mikil eftirspurn er eftir ferðum á henni að nú þarf að taka þessar risastóru Airbus vélar í notkun á henni.

Áætlað er að hefja flug með Airbus vélunum þann 1. júlí næstkomandi. A380 vélarnar taka 519 farþega. 230 vélar af þessari tegund voru framleiddar en framleiðslunni hefur nú verið hætt.

Stysta flugleið heims er í Skotlandi á milli eyjanna Westray og Papa Westray. Flugið tekur 90 sekúndur og er flogið í litlum átta manna flugvélum.