Það er ljóst að nú breytist staðan á Evrópuþinginu. Hinir hefðbundnu flokkar töpuðu fylgi en flokkar græningja og þjóðernissinnaðra íhaldsmanna sóttu í sig veðrið. Það er þó hægt að segja að hinir hefðbundnu flokkar hafi náð að verja stöðu sína þrátt fyrir að hafa tapað fylgi en þó er ljóst að valdahlutföllin á þinginu eru breytt.
Erfitt er að segja af hverju kjörsóknin jókst nú en ekki er ólíklegt að Brexit-öngþveitið, „America First“ stefna Donald Trump, loftslags- og umhverfismál og málefni flóttamanna og innflytjenda hafi dregið kjósendur á kjörstað. Allt eru þetta mál þar sem ESB er í lykilhlutverki.
Miðað við talningu atkvæða í 22 aðildarríkjum og útgönguspár í 6 ríkjum þá voru það flokkarnir á sitthvorum væng stjórnmálanna sem nutu góðs af aukinni kjörsókn en hefðbundnu flokkar mun síður.
Stóru hefðbundnu flokkarnir, jafnaðarflokkar, íhaldsflokkar, miðjuflokkar og kristilegir flokkar, fengu í raun slæma kosningu en náðu samt að verja stöðu sína að ákveðnu leyti. Grænir vinstri flokkar fengu góða kosningu og þjóðernissinnaðir efasemdarmenn um ágæti ESB fengu mjög góða kosningu.
Flokkar, sem eru hlynntir Evrópusamstarfi og ESB, náðu að halda þeim meirihluta sem þeir hafa haft á Evrópuþinginu eða um tveimur þriðju hlutum þingsæta. En tvö stærstu bandalögin á þinginu, íhaldsmenn í EPP og jafnaðarmenn í S&D, töpuðu í fyrsta sinn meirihluta sínum og verða því að leita út fyrir þessi tvö bandalög um samstarf til að tryggja sér meirihluta á þinginu. Græningjar sóttu á og þá sérstaklega í Finnlandi, Þýskalandi, Portúgal og Frakklandi. Bandalag frjálslyndra, Alde, styrkti einnig stöðu sína og þá aðallega vegna þess að Emmanuel Macron, Frakklandsforseti, ákvað að flokkur hans muni ganga í bandalagið á Evrópuþinginu. En gott gengi frjálslyndra þýðir ekki endilega að bandalag íhaldssamra þjóðernisflokka, sem eru gagnrýnir á stefnuna í málefnum flóttamanna og innflytjenda, komist til mikilla áhrifa á Evrópuþinginu. Það gæti orðið á brattann að sækja fyrir þá að verða það afl á Evrópuþinginu sem þá dreymir um, afl sem getur komið í veg fyrir frekara Evrópusamstarf.