Bobby Joe Long, 65 ára fangi á dauðadeild, var tekinn af lífi í Flórída í nótt. Bobby var dæmdur til dauða fyrir að drepa átta konur árið 1984. Þá var hann dæmdur fyrir fjölmargar nauðganir, eða hátt í 40 talsins.
Bobby kaus að tjá sig ekki áður en banvænni lyfjablöndu var dælt í líkama hans.
Bobby lék lausum hala á svæðinu við Tampa á Flórída árið 1984 og gekk rannsókn lögreglu illa til að byrja með. Það var ekki fyrr en Lisa Noland slapp úr klóm hans að hreyfing komst á málið og var Bobby handtekinn í kjölfarið. Lisa var á staðnum og varð vitni að því þegar Bobby dró andann í síðasta sinn í nótt.
Bobby varð 98. fanginn til að verða tekinn af lífi síðan dauðarefsingar voru heimilaðar að nýju í Flórída árið 1976.