Enn er verið að rannsaka hið dularfulla hvarf Madeleine McCain úr sumarleyfisíbúð foreldra hennar í Algarve í Portúgal 2007. Hún hvarf sporlaust úr íbúðinni kvöld eitt á meðan foreldrar hennar höfðu brugðið sér út að borða. Þrátt fyrir gríðarlega umfangsmikla rannsókn portúgölsku og bresku lögreglunnar hefur ekkert miðað áleiðis við rannsókn málsins.

Nýlega kom fram í breskum fjölmiðlum að Martin Ney, 48 ára Þjóðverji, væri nú grunaður um að hafa numið Madeleine á brott. Hann er þekktur barnaníðingur og raðmorðingi en hann var dæmdur fyrir að hafa myrt þrjá drengi.

Sumarið 1995 var átta ára þýskur drengur, Dennis Rostel, numinn á brott af tjaldsvæði í Selker Noor í Slesvík í Þýskalandi. Þar var Ney að verki. Hann myrti litla drenginn síðan og gróf lík hans á plantekru á Jótlandi í Danmörku.

Tveimur vikum síðar fannst líkið. Ney hafði leigt sér sumarhús á svæðinu þar sem hann nauðgaði drengnum í nokkra daga áður en hann myrti hann og gróf líkið. 16 ár liðu þar til að hann var handtekinn og refsað fyrir hryllingsverkið. Við réttarhöldin játaði hann að hafa myrt þrjá þýska drengi og að hafa níðst kynferðislega á um 45 til viðbótar. Yfirleitt var hann með andlitsgrímu áður en hann réðst á börnin og beitti þau kynferðislegu ofbeldi að næturlagi. Yfirleitt gerðist þetta í sumarbúðum en einnig nokkrum sinnum á heimilum barnanna eða barnaheimilum.

Ney var dæmdur í lífstíðarfangelsi árið 2012 og er vistaður á öryggisdeild.