Sonardóttir hennar, Jean Skarby, vakti athygli á málinu á Facebook og hafa viðbrögð Dana verið mikil.
Haft var samband við Jean á sunnudeginum, en hún er nánasti aðstandandi ömmu sinnar, og henni sagt að amma hennar hefði dottið út úr sjúkrahúsrúminu og hefði úlnliðsbrotnað, farið úr axlarlið og kinnbeinsbrotnað.
„Bæði faðir minn og bróðir hans eru látnir svo ég er eini ættingi hennar.“
Sagði Jean í samtali við Ekstra Bladet.
Hún fékk litlar og ansi strjálar upplýsingar frá sjúkrahúsinu um málið en mátti ekki fá allar upplýsingarnar fyrr en hún hafði fengið umboð hjá ömmu sinni til að fá upplýsingarnar.
Jean leggur áherslu á að hún sé ekki reið út í starfsfólk sjúkrahússins heldur vilji hún vekja athygli stjórnmálamanna á málinu og ástandinu í heilbrigðiskerfinu. Hún sé ekki reið yfir slysinu, óhöpp geti alltaf orðið, heldur sé það eftirleikurinn sem hafi reitt hana til reiði.
„Ég fékk að vita á sjúkrahúsinu að það þyrfti að skera hana upp á úlnliðnum en daginn eftir var hringt frá dvalarheimilinu sem sagðist hafa fengið að vita að það þyrfti ekki. Nú segði sjúkrahúsið að amma gæti notað höndina til að borða ef hún væri með spelku.“
Á þriðjudag í síðustu viku fór Ruth til heimilislæknisins síns. Hann sá að kvarnast hafði úr mjöð hennar við fallið og hjartsláttur hennar var óreglulegur. Hún var því lögð aftur inn á sjúkrahús. Ruth er aðeins 36 kíló. Hún var síðan útskrifuð næsta dag.
Jean segist hafa orðið reið við þetta og hafi auk þess fengið að vita að amma hennar hefði brákað höfuðkúpuna.
„Er það svona sem það er að verða gamall? Við sjáum að þú átt við vanda að stríða en við gerum ekkert í því.“
Ruth man ekki eftir að hafa dottið út úr rúminu og hún finnur til vegna meiðslana. Jean segist óttast að hún lifi ekki til jóla.
„Ég sé á mörgum athugasemdanna að aðrir hafa lent í svipaðri reynslu. Ef við búum virkilega í velferðarsamfélagi verður að gera eitthvað. Það er ekki hægt að spara meira.“
Sagði Jean í samtali við Ekstra Bladet.
