Danska ríkisútvarpið (DR) stóð fyrir minningartónleikum um Kim Larsen á Ráðhústorginu í Kaupmannahöfn í gærkvöldi. Talið er að um 35.000 manns hafi sótt tónleikana sem var sjónvarpað beint á aðalrás DR. Risaskjám var komið fyrir í nágrenni Ráðhústorgsins og einnig í Árósum, Álaborg og Óðinsvéum. Í Árósum söfnuðust um 8.000 manns saman til að horfa á tónleikana á risaskjá, um 10.000 í Álaborg og um 3.500 í Óðinsvéum, heimabæ Larsen.
Margir listamenn komu fram og sungu lög eftir Larsen en það verður að segjast að fæstir þeirra eru mjög þekktir og hefur það verið gagnrýnt nokkuð. Ekstra Bladet sagði til dæmis að tónleikunum loknum að þeir hefðu ekki verið Larsen til sóma, svo slakir hefðu flestir listamennirnir verið.
Stúlknakór DR kom fram og söng síðasta lagið og má kannski segja að flutningur kórsins á laginu Om lidt hafi staðið upp úr dagskrá kvöldsins.
https://www.youtube.com/watch?v=D-n5iH0q-RA