Konurnar sex, sem voru á aldrinum 14 til 26 ára, voru myrtar á fimm mánaða tímabili í San Meteo í Kaliforníu og í Reno í Nevada. Fimm morðanna voru aldrei upplýst en lögreglan taldi sig hafa upplýst morðið á Michelle Mitchell, 19 ára háskólanema. Það var geðsjúk kona sem játaði að hafa myrt hana og var dæmd í fangelsi fyrir það árið 1979. Hún dró játningu sína til baka síðar og var að lokum sýknuð árið 2014. Hún var þá búin að sitja í fangelsi í tæplega 30 ár.
Ástæðan fyrir sýknu hennar var að þegar lögreglumenn fóru yfir málsgögnin fundu þeir sígarettustubb sem fannst í bílskúrnum þar sem hendur Michelle Mitchell höfðu verið bundnar fyrir aftan bak áður en hún var skorin á háls. Sígarettustubburinn var sendur til rannsóknar og kom þá í ljós að erfðaefni á honum pössuðu við erfðaefni manns frá Oregon. Hann sat þá í fangelsi fyrir nauðgun og morðtilraun.
Maðurinn heitir Rodney Halbower og er 69 ára í dag. Hann var færður fyrir dómara í Redwood City á föstudaginn eftir margra ára tafir. Hann er ákærður fyrir að hafa myrt tvær af fyrrnefndum konum en er grunaður um að hafa myrt þær allar. Hann er einnig grunaður um að hafa nauðgað þeim öllum.
„Ég hef aldrei nauðgað neinum, aldrei nokkru sinni.“
Hrópaði hann þegar réttarhöldin hófust.
Saksóknarinn í San Mateo, Steve Wagstaffe, segir Hallbower vera „geðsjúkan raðmorðingja“ og krefst lífstíðarfangelsis yfir honum.
Það að lögreglunni tókst að hafa uppi á Hallbower á líklegast rætur að rekja til flótta hans úr fangelsi í Nevada 1986. Hann fór til Oregon og braut af sér þar áður en hann var handtekinn og sendur aftur til Nevada til að ljúka afplánun sinni. Þegar hann hafði lokið afplánun í Nevada var hann sendur aftur til Oregon til að afplána 15 ára dóm þar. Þegar hann kom til afplánunar þar var tekið dna-sýni úr honum sem var skráð í gagnagrunn, sem er fyrir allt landið. Það var einmitt þetta sýni sem tengdi hann við Gypsy Hill morðin.
Myndin er fylgir frétt var fengin frá vaping360.com
