Tveir blaðamenn á vegum fréttastofunnar Reuters hafa verið dæmdir í fangelsi í Mjanmar fyrir að brjóta lög um þjóðaröryggi. Blaðamennirnir Wa Lone og Kyaw Soe Ooo neita sök í málinu. Blaðamennirnir unnu við að rannsaka ásakanir um að herinn í landinu hafi framið þjóðarmorð á Rohingya múslimum. Hafa meðal annars Sameinuðu þjóðirnar krafist þess að Alþjóðlegi stríðsglæpadómstóllinn rannsaki ásakanir í garð hersins í landinu.

Þegar blaðamenn náðu tali af þeim á leið út úr dómsal sögðust þeir hafi gert allt siðferðislega rétt og að þeir hefðu ekki gert neitt til að skaða þjóð sína. „Við frömdum engan glæp. Samt sem áður ákváðu þeir að dæma okkur,“ hefur BBC eftir þeim á tröppum dómstólsins.

Stephen Adler, ritstjóri Reuters, sagði að þessi dómur væri skref aftur á bak í lýðræðisþróun í Mjanmar og krafðist þess að ríkisstjórn landsins leiðrétti þessi mistök, sem væru árás á frelsi fjölmiðla. Í nýlegri skýrslu Sameinuðu Þjóðanna er stjórnarher landsins sakaður um þjóðarmorð og mannréttindabrot. Um 700.000 Rohingya múslimar hafa flúið landið á undanförnum 12 mánuðum til Bangladess.