Bandarískur hermaður, sem starfar í herstöð á Hawaii, játaði í gærkvöldi fyrir dómi að hafa lagt hryðjuverkasamtökunum sem kenna sig við Íslamska ríkið (IS) lið. Ikaika Kang, liðþjálfi, játaði að hafa látið samtökunum hernaðarleyndarmál í té. Hann sagði dómara að hann hefði afhent IS óskilgreind og leynileg skjöl.

Hann játaði einnig að hafa afhent IS dróna sem átti að nota til að finna bandaríska hermenn. Saksóknari segir að Kang hafi snúist á sveif með IS í ársbyrjun 2016. Alríkislögreglan FBI hóf að rannsaka mál hans í ágúst 2016. Niðurstaða rannsóknarinnar var að Kang hefði afhent IS mikið magn rafrænna skjala.

Skjölin innihalda viðkvæmar upplýsingar, þar á meðal upplýsingar um vopn hersins, nákvæmar upplýsingar um stýrikerfi flugvéla, ýmsar notkunarleiðbeiningar auk persónulegra upplýsinga um hermenn.

Saksóknari segir að þegar Kang fundaði með meðlimum IS eitt sinn hafi hann svarið samtökunum hollustu sína á arabísku og ensku og hafi kysst fána samtakanna. Verjandi Kang sagði alveg ljóst að Kang hefði verið ginntur til liðs við IS en lög sem ná yfir það séu mjög flókin og því erfitt fyrir verjendur að sanna það.

Kang samdi við saksóknara um að játa fyrrgreind ákæruatriði gegn því að hann yrði ekki ákærður fyrir önnur afbrot, þar á meðal brot á lögum um njósnir og önnur lög er tengjast hryðjuverkum.

Ónafngreindur heimildarmaður segir að Kang hafi verið heltekinn af myndböndum af sjálfsvígssprengjumönnum, afhöfðunum og öðru álíka ofbeldisefni og hafi oft eytt mörgum klukkustundum daglega við að horfa á slíkt myndefni.