Það er bandaríski leikarinn Chuck Lamb sem hefur ákveðið að setjast í helgan stein vegna bakmeiðsla. Það eru kannski ekki margir sem kannast við Lamb en undanfarin 12 ár hefur hann einbeitt sér að því að leika dáinn mann í hinum ýmsu sjónvarpsþáttum.
Lamb gaf sér sjálfum heitið „Dead Body Guy“ sem við þýðum bara sem „Dauði gaurinn“. Ferill hans sem líks hófst 2006 í What I Like About You. Síðan hefur þessi sextugi leikari brugðið sér í gervi „Dauða gaursins“ í 10 þáttum til viðbótar.
Á vefsíðu hans kemur fram að hann vonist til að einhver taki við vefsíðunni og verði jafnvel „Dauði gaurinn 2.0“ eða eitthvað álíka.
Sumir halda kannski að það sé hægðarleikur að leika lík en svo er ekki að sögn Lamb. Í samtali við Sky sagðist hann eitt sinn hafa þurft að liggja í miðju maurabúi í um klukkustund meðan verið var að taka atriði upp. Hann á sér þó draum um að geta leikið „Dauða gaurinn“ þrisvar til viðbótar, þar á meðal í Walking Dead seríunni.