Margrét Leifsdóttir, sem ávallt er kölluð Magga Leifs, notar sína styrkleika og gefur af sér til að ná markmiðum sínum sem er að lifa áreynslulausu, heilsusamlegu og ánægjulegu lífi. Magga Leifs er þekkt fyrir sína dásamlegu hollu og góðu rétti og grauta sem hafa slegið í gegn á þeim námskeiðum sem hún hefur haldið. En hún hefur reglulega staðið fyrir námskeiði þar sem þátttakendur hafa verið á hreinu mataræði í 10 daga. Í Fréttablaðinu á dögunum var viðtal við Margrét þar sem hún svipti hulunni af sínum uppáhalds graut sem hún fær sér gjarnan í morgunmat. Það er þess virði að prófa þennan sem gefur fulla orku út í daginn.
Uppáhalds grautur Margrétar
Grautarmix
2 dl hafrar
1 dl hempfræ
½ dl chia fræ
½ tsk. kanill
½ tsk. sjávarsalt
½ tsk. malaðar kardimommur
Þetta á ég í krukku tilbúið, þannig að ég þarf bara að bæta við heitu vatni og tvisti sem tekur enga stund.
Grautur með tvisti
1 ½ dl grautarmix í skál
2 dl heitt vatn bætt í skálina
Mögulega 1-2 litlum dökkum súkkulaðimolum laumað ofan í heitan grautinn
Látið bíða í 3-5 mínútur.
Tvist
Toppað með múslí, möndlusmjöri, smátt skornum epla- eða perubitum, slettu af grískri jógúrt eða kókósjógúrt. Stundum bæti ég frosnum hindberjum við og ef ég ætla að vera sérstaklega flott á því þá set ég þeyttan rjóma í staðinn fyrir gríska.
Þessi grautur er prótínríkur og vel samsettur hvað varðar góða fitu á móti kolvetnum. Þannig að hann hefur góð áhrif á blóðsykurinn.