Nú er úti veður vont og allir halda að allt fari í klessu. Þá er lag að útbúa eitthvað sumarlegt og gleðja sálina og augað. Ef þessi sumarsangria færir okkur ekki sumarið þá vitum við ekki hvað. Ástríðuávöxturinn í bland við allt þetta sumarlega hráefni, er fullkomið. Súper svalandi og fullkominn drykkur.
Berglind Hreiðars okkar ástsæli köku- og matarbloggari deilir þessum dásamlegu sumarlegu uppskriftum á bloggsíðu sinni Gotterí og gersemar. „Ég sá þessa hugmynd af sangriu hjá Plated Cravings og útfærði eftir mínu höfði og útkoman var hreint út sagt dásamleg,“ segir Berglind er í sumarskapi þrátt fyrir að veðrið sé að stríða okkur þessa dagana. Ef þið viljið hafa sangriuna alla áfengislausa má setja meira appelsínu sódavatn í staðinn fyrir hvítvínið.
Sumarsangria
Um það bil 10 glös
1 appelsína
2 lime
4 x ástríðuávöxtur
300 ml ananassafi
200 ml appelsínusafi
500 ml sódavatn með appelsínubragði (Toppur)
600 ml Muga hvítvín eða hvítvín að eigin vali
Skerið appelsínu og lime niður í bita. Gott að skipta hverri appelsínusneið í 6 hluta og hverju lime í 4 hluta, setjið í stóra skál. Skafið innan úr ástríðuávextinum og setjið í skálina. Hellið næst ananassafa, appelsínusafa, sódavatni og hvítvíni í skálina og hrærið saman. Fyllið glös af klökum og loks sangriu. Ljúft að njóta með girnilegu hnetumixi og smáréttum að eigin vali.