Inga Sæland er  formaður Flokks fólksins og oddviti flokksins í Reykjavík suður. Hún býður upp á ódýran og einfaldan kartöflurétt fyrir kjósendur sína. Uppskriftin er birt á Heimkaup sem hluti af herferðinni  Kjóstu rétt. Þar deilir forsvarsfólk flokkanna uppskrift sem það telur í takt við stefnu sína og Heimkaup birtir lista yfir hráefnin og hvað þau kosta.

„Flokkur fólksins er ekki að reyna að vera neitt sem hann ekki er. Hér mætir hann til leiks með rétt sem sem er fullkominn fyrir þau sem vart ná endum saman. Sá stóri hópur gæti þó þurft að sleppa kryddjurtunum, en kartöflurnar einar og sér eru herramannsmatur.  Áfram Flokkur fólksins!“ segir Inga.

Hráefni fólksins

• Kartöflur, mega gjarnan vera heldur litlar. Magn fer eftir aðstæðum. 
• Salt
• Olía
• Kraminn hvítlaukur – setur aðeins meira stuð í réttinn
• Kryddjurtir, þær gera réttinn fallegri og bæta svona aðeins við hann – má sleppa.

Svona gerir fólkið

1. Sjóðið kartöflurnar.
2. Takið úr vatninu og þerrið örlítið.
3. Hellið dálítið af olíu á bökunarpappír sem lagður hefur verið yfir ofnskúffu.
4. Kremjið kartöflurnar t.d. með því að ýta glasi varlega ofan á hverja og eina þannig að hún opnist.
5. Penslið með olíu og stráið salti og hvítlauk yfir 
6. Bakið við 200 gráður í 20-25 mín.

Njótið.

Uppskrift frá Ingu Sæland