Anna Björk Eðvarðsdóttir matarbloggari með meiru segir að það sé bæði skemmtilegt og spennandi að þróa nýjar uppskriftir. Hún deilir hér gómsætri uppskrift.
Sjá einnig: Þetta borðar Anna Björk á venjulegum degi
„Andaleggir eru nýja uppáhaldið mitt þessa dagana. Loksins er alltaf hægt að fá þá, í flestum verslunum og þeir eru ekki dýrir. Þetta er mjög einföld uppskrift, en gefur engan afslátt af bragði og gæðum. Það er mjög einfalt að minnka uppskriftina eða stækka,“ segir Anna Björk.
Fyrir 6:
- 6 andaleggir
- 12 skarlottulaukar, miðlungs stórir, í heilu lagi
- 2 lárviðarlauf
- 1/2 tsk. ný marin allrahanda ber (allspice), eru til frá Kryddhúsinu, eða tilbúin möluð
- 1/2 tsk. sjávarsalt
- 3 dl hvítvín
- Í sætkartöflumúsina:
- 1 kg. sætar kartöflur, skrældar og skornar í bita
- Stór klípa smjör
- Fersk múskathneta, rifin
- Sjávarsalt
- Söxuð steinselja, til skrauts
Aðferð
Andaleggirnir:
- Ofninn er hitaður í 190°C.
- Skarlottulaukarnir eru skrældir, en hafir heilir.
- Húðin á andaleggjunum er pikkuð með gaffli.
- Allrahanda kryddið er marið í mortéli og blandað saman við sjávarsaltið.
- Leggirnir eru nuddaðir vel með kryddinu og lagðir í einfalt lag í ofnskúffu, lauknum og lárviðarlaufinu er stungið inn á milli.
- Síðan er skúffunni stungið i ofninn og leggirnir bakaðir í 1 klst.
- Þá er skúffan tekin úr ofninum og mesta af fitunni fjarlægð úr skúffunni með stórri skeið og sett í skál og geymt, ef þú vilt nota hana seinna.
- Hvítvíninu er hellt í skúffuna og henni stungið i ofninn aftur og bakað áfram í 20 mín., borin á borð með lauknum og sætkartöflumúsinni.
Sætkartöflumúsin:
- Sætu kartöflurnar eru skrældar og skornar í bita.
- Suðan er látin koma upp á söltu vatni í rúmgóðum potti.
- Kartöflurnar eru soðnar þar til þær eru meyrar, ca. 7-10 mín.
- Kartöflunum er hellt í sigti þegar þær eru soðnar og vatnið látið renna vel af þeim.
- Settar aftur í pottinn, ásamt stórri klípu af smjöri (ekki spara það) og maukaðar með töfrasprota.
- Smakkaðar til með sjávarsalti og góðum slatta af ný rifinni múskathnetu.
- Verði þér að góðu 🙂
