Falleg og góð marengskaka er alltaf tilvalin í veislur, hérna ákvað ég að gera smá breytingu og taka til hliðar smá part af marengsblöndunni, lita hana með bleikum matarlit og nota mismunandi sprautustúta til að fá fallega marengstoppa til að skreyta kökuna með.
Marengsbotn
4 stk. eggjahvítur
200 g sykur
2 tsk. vanilludropar
400 ml rjómi
Byrjið á að stilla ofninn á 150 gráður.
Klæðið bökunarplötu með bökunarpappír.
Þeytið eggjahvítur þar til þær fara að freyða vel og hellið sykrinum hægt og rólega saman við, vanilludroparnir fara svo næst saman við. Þeytið vel saman eða þar til að stíf marengsblanda myndast.
Hellið marengsblöndunni á bökunarpappírinn og myndið tvo jafna hringi og sléttið vel úr.
Takið aðeins af blöndunni til hliðar, litið með matarlit, setjið í sprautupoka og sprautið með mismunandi sprautustútum á sér bökunarplötu með bökunarpappír undir.
Bakið í 40 mínútur, takið út úr ofninum og látið kólna.
Þeytið rjóma og leggið á milli botnanna.
Setjið karamelluna yfir kökuna og á milli botnanna.
Skreytið að vild, sjá meðfylgjandi mynd.
Karamella 4 stk. eggjarauður
60 g flórsykur
50 g smjör
200 g mjólkursúkkulaði
Bræðið saman í potti smjör og súkkulaði við vægan hita og hrærið vel í, leyfið aðeins að kólna. Hrærið saman eggjarauður og flórsykur.
Bætið svo súkkulaðinu saman við flórsykurblönduna og hrærið vel saman og hellið yfir kökuna og milli botnanna.