Margir hafa beðið spenntir eftir Hátíðarostinum frá Biobú frá því um síðustu jól en þá kom hann á markað í fyrsta skipti. Nú er biðin á enda því Hátíðarosturinn er nú kominn í verslanir aftur fyrir þessi jól. Osturinn var unninn í samstarfi við Matarbúr Kaju/Café Kaju sem sérblandaði kryddblöndu sem ostinum er velt upp úr. Í honum er paprika, broddkúmen, herbes de provence, sjávarsalt, sinnepsfræ, hvítlaukur og svartur pipar sem mynda skemmtilegt bragð sem kemur braglaukunum á flug.

,,Hátíðarosturinn er dásamlegur einn og sér, á ostabakkann, í matseldina eða það sem hugurinn girnist,“ segir Ása Hlín Gunnarsdóttir, forstöðumaður markaðsmála hjá Biobú.

Hún segir ánægjulegt hve margir biðu spenntir eftir jólaostinum enda sé fátt skemmtilegra en að koma með vöru á markað sem slær í gegn. Fleiri spennandi nýjungar eru væntanlegar frá fyrirtækinu á næstunni en Biobú er framleiðslufyrirtæki sem notar eingöngu lífræna mjólk og lífræn hráefni í sína framleiðslu. Úrvalið samanstendur af fjölmörgum tegundum af jógúrt, grískri jógúrt, ostum, mjólk og nú nýlega kjöt vörum. Lífrænar vörur eru í mikilli sókn og margir leggja mikið upp úr því að velja lífrænt.

Osturinn fæst í Hagkaup, Fjarðarkaup, stærri Krónubúðum, Melabúðinni, Brauðhúsinu, Matarbúr Kaju/Café Kaju, Heimkaup og Frú Laugu.