Bjórinn We took them in the Bakarí sigraði alþjóðlegu bjórkeppni Brewdog, Collabfest 2021, nú á dögunum. 75 brugghús víðs vegar að úr heiminum öttu kappi við framlag íslensku brugghúsanna Böl og Brewdog. Baráttan var hörð að sögn Andra Birgissonar, framkvæmdastjóra Brewdog Reykjavík. „Þetta var hörð barátta og komst bjórinn okkar fljótlega upp í topp 5. Baráttan endaði svo á milli okkar og Duckpond Brewing frá Gautaborg í Svíþjóð,“ segir Andri.
“We took them in the bakarí er dökkur stout bjór bruggaður með snúðum sem við rupluðum frá vinum okkar í Brikk bakaríinu. Bjórinn er bruggaður með ýmsum tegundum af dökku ristuðu korni og höfrum. Stíllinn er svolítið bland í poka, kveik pastry export stout, sem þýðir í rauninni sterkur stout með norsku sveitageri og bakkelsi” segir Hlynur Árnason, bruggmeistari Böl.
Þeir félagar segja að bjórinn hafi verið sérbruggaður fyrir þessa einu helgi, en þó sé eftir takmarkað upplag sem hægt er að nálgast á Brewdog Reykjavík. Böl er svokallað flökkubrugghús sem tók til starfa síðastliðið vor. Það sérhæfir sig í hágæða bjórum „fyrir fólk sem vill prófa eitthvað nýtt og skemmtilegt,“ eins og þeir sjálfir komast að orði.
Um fjögur þúsund glös seldust af bjórnum á fjórum dögum á hátíðinni ytra. Hlaut We took them in the Bakarí 4.15 í einkunn af 5 mögulegum. Ekki mátti miklu muna reyndar, því næsti bjór á eftir var með 4,14. Sá var sænskur og verðlaunin fyrir þriðja sætið fóru alla leið til Japans.