Sveinn Kjartansson er einn þekktasti matreiðslumaður landsins. Hann hefur vakið athygli fyrir sjónvarpsþætti sína, Fagur fiskur í sjó, og rak til að mynda AALTO Bistro í Norræna húsinu í tæp fimm ár áður en hann söðlaði um í fyrra og starfar nú sem forstöðumaður matar- og veitingasviðs Seðlabanka Íslands.
„Ég reyni að halda mig í hollari kantinum eins og flestir. Að því sögðu þá finnst mér að þegar maður svindlar – ekki ef heldur þegar – þá eigi að gera það með góðri samvisku,“ segir Sveinn. Hann er mikill nammigrís og heldur sérstaklega upp á dökkt súkkulaði með myntufyllingu þegar hann vill gera vel við sig.
Ostabakan í útrás
Sveinn hefur verið í matreiðslugeiranum í 35 ár og þykir sérlega vænt um minningar frá því hann var nýbúinn að læra og vann á veitingastöðum um öll Bandaríkin. „Ég bara mætti í eldhúsið og þurfti strax að sanna mig. Þá bjó ég alltaf til ostaböku sem ég hafði gert á Listasafni Íslands í gamla daga og heppnaðist alltaf vel. Ég var ekki með ferilskrá þannig að ostabakan var eiginlega mín ferilskrá,“ segir Sveinn. Á sumrin finnst honum best að borða létta rétti, gjarnan fisk og salat, en hann er líka hrifinn af því að búa til grænmetisrétti.
Morgunmatur
Ég vakna um klukkan sex og byrja á að fá mér snafs af Lýsi. Hef gert það í 20 ár. Fæ mér síðan góðan kaffibolla, jafnvel tvo. Í vinnunni er boðið upp á morgunmat og þar borða ég oft hafragraut um klukkan tíu.
Hádegisverður
Ég fæ mér léttan hádegisverð um klukkan tvö. Ég borða það sem er í matinn í vinnunni. Yfirleitt fæ ég mér salat og fisk, kjöt eða grænmetisrétt. Ef ég var orðinn orkulítill fyrr fæ ég mér oft ávöxt.
Millimál
Fer eftir hvað ég tek mér fyrir hendur. Ef ég fer í sund eftir vinnu fæ ég mér oft hafraklatta eftir sund. Stundum fæ ég mér eitthvað sætt þó ég viti að ég hafi ekki gott af því.
Kvöldmatur
Ég elda yfirleitt heima á hverju kvöldi, oftast bara eitthvað einfalt. Fiskur og grænmeti verða gjarnan fyrir valinu.
250 g linguine pasta
Salt
Ólífuolía
100 g valhnetur
200 g birkireyktur silungur
Þroskuð pera
2 vorlaukar
2 msk. valhnetuolía
Svartur pipar
5 stönglar sítrónutimjan
Sjóðið pastað samkvæmt leiðbeiningum á umbúðum, kælið, sigtið og setjið í skál.
Ristið valhneturnar á pönnu og kælið.
Skerið reyktan silunginn í þunnar sneiðar og setjið í skál með pastanu.
Hreinsið peruna og skerið í sneiðar. Blandið saman við pastað.
Skerið vorlaukinn og blandið út í pastað ásamt valhnetunum.
Setjið valhnetuolíuna og pipar á pastað og blandið varlega saman.
Setjið sítrónutimjan yfir, í heilum stönglum eða tínið laufin af stönglunum og dreifið yfir.
Handfylli af skjaldfléttulaufi
4 skjaldfléttublóm
2 tsk. valhnetuolía
Setjið allt saman í skál og dreifið valhnetuolíu yfir.
Umfjöllunin birtist í fyrst í helgarblaði DV 24. júlí.