Viktor Örn Andrésson og Hinrik Örn Lárusson opna í dag verslunina Sælkerabúðina Bitruhálsi. Báðir hafa þeir verið í kokkalandsliðinu og Viktor skrifaði þar að auki eina vinsælustu matreiðslubók síðari ára, Stóru bókina um sous vide.
Sælkerabúðin opnar klukkan tvö í dag, en búðin sérhæfir sig í hágæða kjöti og meðlæti. Þá er einnig mikil áhersla á matarpakka, sem hægt er að sækja eða fá senda. Með þeim getur fólk keypt tilbúna rétti sem það getur hitað upp.
DV heyrði í Viktori sem sagði frá Sælkerabúðinni.
„Við verðum með truflu-kartöflur, grillað broccolini og svo meira úrval sem við munum bæta í smátt og smátt. Við verðum líka mjög góða osta og olíur. Bara allt þetta sem alvöru sælkerabúð á að vera með.“
„Við ætlum að bjóða upp á tilbúnar heildarlausnir þar sem að þú getur bara keypt matinn klárann. Það verður búið að grilla kjötið og svoleiðis. Þetta er hugsað fyrir fínni matarboð, en þó er alveg hægt að panta fyrir einn og upp úr. Ég myndi segja að þetta væri alveg nýtt. Þú þarft ekkert að hugsa um eldhúsið, ert bara að njóta með fjölskyldunni og svo halda allir að þú hafir eldað dýrindis máltíð.“
Viktor og Hinrik hafa litla reynslu af því að reka verslun, en eru ansi reyndir kokkar. Þeir kynntust í undirbúningi kokkalandsliðsins fyrir eina virtustu matreiðslukeppni heims, Bocuse d’Or. Í keppninni hlaut Ísland brons verðlaun sem er einn allra besti árangur liðsins. Auk þess markaði keppnin upphaf á góðu samstarfi.
Viktor bendir á heimasíðu verslunarinnar, Sælkerabúðin.is. Þá segist hann einstaklega ánægður með hönnunina á búðinni sjálfri sem Halli Friðgeirs sá um.