Pizzastaðurinn Spaðinn opnaði í seinustu viku á Dalvegi í Kópavogi og hefur á örskömmum tíma vakið mikla athygli. Staðurinn sérhæfir sig í ódýrum pizzum sem eru ætlaðar fjöldanum. Þórarinn Ævarsson, gjarnan kenndur við Ikea, er maðurinn á bak við Spaðann, en hann hefur átt mikilli velgengni að fagna í veitingageiranum.

Í samtali við DV sagði Þórarinn að hann hefði lengi verið með hugmyndina af Spaðanum í höfðinu og að öll sín reynsla nýtist vel í nýja starfinu.

„Ég er bakarameistari og vann sem bakari í tíu ár. Svo vann ég á Dominos í þrettán ár, þar lærði ég að gera pizzur fyrir mjög marga og hjálpaði til við að móta stefnuna þeirra. Síðan hef ég auðvitað verið í Ikea þar sem að ég hef gert mikinn mat fyrir lágt verð í þrettán ár.“

Þórarinn vill geta rekið Spaðann líkt og Ikea, með því að gera mikinn mat fyrir lítið verð. Hann vilji græða á því að selja mikið, en ekki með því að rukka mikið, en Þórólfur segist vera með hag neytandans í huga.

Ódýrasta pizzan á 700 krónur

Pizzurnar á Spaðanum eru mjög fjölbreyttar, sú ódýrasta kostar 700 krónur, en þær dýrustu kosta 2500. Þórarinn segist hafa verið með 2500 króna verðmiðann í huga þegar að hugmyndin var að mótast og þegar hann sá að það myndi virka fór hann að vinna að staðnum.

Þórarinn segist ekki vita til þess að einhvers staðar sé hægt að kaupa ódýrari pizzur á landinu og segir að í raun séu þetta verð sem ekki hafi sést í mörg ár.

„Ég hef lengi skammast í þeim sem að rukka 400 krónur fyrir hálfan líter af gosi, en hjá mér kostar það 150 krónur.“

„Ég er kominn heim“

Það hefur verið brjálað að gera á Spaðanum. undanfarna daga hafa myndist raðir fyrir utan staðinn og Þórarinn segir að samt eigi staðurinn eftir að auglýsa sig.

„Sumir setja spurningarmerki við það að ég sé komin úr þægilegri velborgaðri skrifstofuvinnu, en ég fann það bara á föstudaginn seinasta þegar að það kom svona smá sprenging í verslunina að ég er kominn heim.“