Ragnar Freyr Ingvarsson, betur þekktur sem Læknirinn í eldhúsinu, var settur í sóttkví í gær. Hann hefur birt myndir af máltíðum sem hann hefur borðað hingað til í sóttkvínni og er óhætt að segja að niðursuðudósir koma hvergi við sögu.
„Ég sá listann,“ segir hann og vísar í lista sem Fréttablaðið birti um hvað fólk þarf að eiga í eldhúsinu í sóttkví.
„Eftir að ég birti myndina í gær fékk ég spurningar um hvar kartöflumúsarduftið væri. En ég held að þetta sé frekar gamaldagslisti nema við förum í einhverja lengri sóttkví. Á tímum heimsendinga frá Heimkaup og Nettó þá held ég að við komumst vel af.“
Ragnar og fjölskylda hans eru í sóttkví. „Foreldrar mínir og æskuvinur minn og fjölskylda hans voru líka sett í sóttkví sama dag. Allir sem komu heim frá Austurríki sama dag, 2. mars. Þegar við komum heim forvitnaðist ég um hvort við ættum að fara í sóttkví en það var ekki búið að skilgreina þennan hluta Austurríkis sem hættusvæði. Það gerðist ekki fyrr en í gær,“ segir Ragnar.
https://www.instagram.com/p/B9hobgbAtyL/
„Ég á það til að birgja mig upp af mat (e. hoarding) þannig hér eru allar frystikistur fullar af lambakjöti og nautakjöti. Konan mín hafði vit á því að kaupa eitthvað af pasta og tómötum í dós og svona. Þannig það fer vel um okkur í sóttkvíinni,“ segir Ragnar.
Fjölskyldu Ragnars finnst ekki leiðinlegt að hann nostri við þau með dýrindismáltíðum.
„Fyrsta daginn var valið að hafa tacos í matinn. Við gerðum tvenns konar, annars vegar kjúklingataco og hins vegar hefðbundið taco með mangósalsa. Þetta var alveg ofboðslega gott. Síðan hafa verið umræður um hvað á að vera í matinn í kvöld. Sonur minn vill gera hamborgara frá grunni,“ segir Ragnar og þá heyrist: „Panta pítsu!“ í bakgrunninum.
„Ragnhildur dóttir mín vill panta pítsu. Hún er sjö ára og er mjög spennt yfir þessari hugmynd með Heimkaup. Hún fann vefsíðuna sjálf á netinu,“ segir hann.
Nema að eitthvað breytist er Ragnar og fjölskyldan í sóttkví til 15. mars.
„Þetta er ekkert hræðilegt. Ég gæti ímyndað mér margt verra en að eyða tíma með fjölskyldunni í viku,“ segir hann.
Aðspurður hvort hann ætli að prófa einhverjar spennandi uppskriftir í vikunni segir Ragnar:
„Já. Ég á nautarif inn í fyrsti og svo er ég með kóreska uppskrift sem mig langar að prófa. Svo elska ég langeldaðan mat, þannig ég ætla að reyna að nota tækifærið og vera duglegur í því. Fyrst að maður hefur allan daginn, af hverju ekki að nota hann allan.“
Þú getur fylgst með Ragnari og eldamennsku hans á Instagram. Hann er einnig með Facebook-síðu og bloggsíðu.
