Gísli Matthías Auðunsson, matreiðslumeistari og veitingamaður hefur ósjaldan eldað kjötsúpu. Hann þróaði nýlega nokkrar nýstárlega kjötsúpuuppskriftir fyrir Kjötsúpudaginn sl laugardag og kennir hér lesendum nokkur leyniráð við súpugerð.
Aðspurður um kjötsúpublæti Íslendinga segir hann líklegustu ástæðuna fyrir vinsældum súpunnar, fyrir utan hvað hún sé góð, að klassíska ömmuuppskriftin er auðveld og hráefnið ódýrt. Sjálfur notar Gísli yfirleitt ekki súputeninga. „Það sem ég geri sem er kannski svolítið óhefðbundið er að ég set alveg extra mikið af beinum út í þegar ég er að laga súpuna. Rista þau fyrst í ofni og þá kemur svo góður kraftur í súpuna.“
Hvernig má bjarga bragðlausri súpu? „Gott salt kemur manni langt, en svo er auðvitað allt í lagi að setja einhvers konar kjötkraft í súpuna. En oft getur verið gott að setja bara ögn meira af súpujurtum og salti til að hún verði bragðbetri. Svo má fólk auðvitað líka leika sér og setja hvítlauk og chili í súpuna – það er í raun fátt heilagt í kjötsúpunni annað en að nota lambakjöt og vel af grænmeti.“
Landsmenn kannast við að heyra talað um ullarbragð af lambakjöti en Gísli kann ráð við því eins og flestu öðru.
„Ullarbragðið kemur oftast ef fitan og brákin sem kemur þegar kjötið er soðið í byrjun er ekki tekið og því leyft að malla vel og lengi í súpunni. Mæli með að passa upp á það. Einnig, ef það er of mikil fita getur hún gefið ákveðið þráabragð í súpuna, þannig að þá er einnig gott að fleyta fituna af toppnum með ausu. En svo snýst þetta bara um að krydda hana aðeins meira og salta.“