Rósa Guðbjartsdóttir bæjarstjóri Hafnafjarðar og matreiðslubókahöfundur er mikil listakona í eldhúsinu. Hún er sérstaklega fær í súpugerð og er fiskisúpan hennar ein sú besta og ekki er hún verri daginn eftir. Uppskriftin er upprunalega úr matreiðslubók Rósu, Eldað af lífi og sál.
Sjálf hef ég gert margar uppskriftir en enda alltaf aftur á því að gera þessa súpu en set löngu og lax í staðinn fyrir rækjur og krydda hana meira. Ljúffengri súpu er vart hægt að hugsa sér!
Fiskisúpa Rósu
Uppskriftin er fyrir fjóra
5-600 g fiskur (hvaða tegund sem er)
100-150 g rækjur
½ msk. ólífuolía
1 laukur, smátt saxaður
1 paprika (hvaða lit sem er), kjarnhreinsuð og skorin smátt
2-3 gulrætur, smátt skornar
2-3 hvítlauksrif, marin
1 dós niðursoðnir tómatar
8 dl mjólk
2 dl matreiðslurjómi
(1 ½ dl hvítvín)
2 fiskiteningar
1 tsk. timjan
½ dl fersk steinselja, smátt söxuð
salt og grófmalaður pipar
Mýkið lauk og hvítlauk í ólífuolíunni í potti við vægan hita. Bætið gulrótunum og paprikunni saman við og síðan tómötunum. Látið malla í nokkrar mínútur. Bætið mjólkinni útí og fiskiteningunum.
Kryddið með timjan, salti og pipar og bætið síðan matreiðslurjómanum út í. Ef þið viljið nota hvítvín í súpuna þá minnkið annan vökva, mjólk eða matreiðslurjóma sem því nemur, td. um 1 og ½ dl. Hvítvíninu er þá bætt út í um leið og matreiðslurjómanum.
Bætið loks fiskinum og rækjunum út í súpuna og látið rétt hitna í gegn áður en súpan er borin fram.