Það er vinsælt að sérfræðingar í veitingahúsageiranum hefji nýja árið á að spá fyrir um strauma og stefnu í bransanum, hvort sem það er í mat eða drykk. Athygli vekur að eitt trend er að finna á mörgum listum sérfræðinga, en það er kallað á ensku „anti-Instagram interiors“, sem gæti útlagst sem „and-Instagram innréttingar“. Þessi tíska er meðal annars talin með þeim stærri í bransanum samkvæmt alþjóðlegri skýrslu markaðsfyrirtækisins J. Walter Thompson.
Þeir nýju veitingastaðir sem hafa náð hvað mestri athygli í veitingahúsabransanum hafa tileinkað sér þetta trend, til að mynda veitingastaður Gordons Ramsay, Lucky Cat, sem var opnaður í London í júní í fyrra. Staðurinn er innréttaður í dökkum tónum og vildu hönnuðir meðvitað forðast sterka liti, djarft veggfóður og ágenga lýsingu, sem veitingastaðir hafa unnið með svo fólk gæti tekið myndir fyrir Instagram á staðnum. Djúpir litir og dökk lýsing Lucky Cat skapar andrúmsloft sem á að njóta á staðnum – ekki af skjá.
Það var hönnunarstofan AfroditiKrassa sem sá um að innrétta staðinn og segir stofnandi stofunnar, Afroditi Krassa, í samtali við Dezeen að stofan hafi viljandi gert staðinn dökkan til að letja fólk í að deila myndum af honum og matnum á Instagram.
„Við reyndum að vinna með efni og liti sem eru mildir og klassískir, sem æpa ekki á mann,“ segir hún. „Hve oft heimsækir maður stað því hann lítur vel út á myndum en veldur manni vonbrigðum í raunheimi?“
Farið er fögrum orðum um Lucky Cat í skýrslu J. Walter Thompson, en einnig bent á aðra staði sem hafa orðið brautryðjendur í þessum tískustraumi, þar á meðal veitingastaðurinn og barinn Marcus á Four Seasons-hótelinu í Montreal sem var opnaður í maí í fyrra. Í skýrslunni er því spáð að þetta marki upphaf endaloka Instagram-hugarfarsins, þar sem allt þarf að enda á samfélagsmiðlum, og við taki tímabil þar sem almenningur reynir að aftengjast.
„Þessi hönnunaraðferð markar endalok glysgjarna „horfðu-á-mig“-tímabilsins sem gerði mun meira en þurfti úr upplifun og varð til þess að rými voru hönnuð með þann eina tilgang að líta vel út á samfélagsmiðlum,“ stendur í skýrslunni. „Í framtíðinni munu neytendur velja rými sem hvetja þá til að lifa í núinu frekar en að upplifa heiminn í gegnum linsuna á símanum.“
Síðasta tæpa áratuginn hefur samfélagsmiðillinn Instagram fest sig vel í sessi og er þriðji stærsti samfélagsmiðill í heimi, á eftir Facebook og YouTube. Margir tala ekki lengur um að taka myndir heldur einfaldlega „að gramma“ eða „setja á Instagram“. Myndir eru þvældar til í leit að fullkomnun og eitt af því sem hefur verið hvað vinsælast á miðlinum eru myndir af mat og veitingastöðum. Raunar hafa margir áhrifavaldar atvinnu af því að heimsækja veitingastaði og borða þar mat sem síðan er myndaður í bak og fyrir í þeim eina tilgangi að setja á Instagram og auglýsa veitingastaði.
Nú virðist stefna í að veitingastaðir, allavega þeir sem eru með verð og standard í hærri endanum, ætli að snúa baki við markaðssetningu með hjálp áhrifavalda og einbeita sér að því að skapa góða upplifun fyrir veitingastaðagesti, í rólegu og mildu andrúmslofti þar sem síminn er víðs fjarri og hugurinn bundinn við mat, drykk og félagsskap.