Súkkulaðiframleiðendur um heim allan hafa opnað dyr að framleiðslu sinni á stafrænni súkkulaðihátíð sem heitir einfaldlega #StayHomeWithChocolate.
Hátíðin hófst þann 24. mars og lýkur laugardaginn 28. mars, á morgun. Öllum viðburðum hátíðarinnar, allt frá námskeiðum til fyrirlestra, hefur verið streymt beint á Instagram en allir framleiðendur sem taka þátt framleiða svokallað „frá baun til stykkis“ (e. Bean-to-bar) súkkulaði.
Íslendingar eiga fulltrúa á hátíðinni, framleiðandann Omnom. Kjartan Gíslason, einn af framleiðendum Omnom, segir í samtali við Forbes að sala á súkkulaði hafi hrunið í skugga kórónuveirufaraldurs og því fagni hann framtakinu, en COVID-19 hefur haft gríðarlega slæm áhrif á litla súkkulaðiframleiðendur víðs vegar um heiminn.