DV barst á dögunum ábending frá íslenskum ferðamanni um að bakarí og kaffihús í Buffalo í New York-ríki hefði heiðrað Björk Guðmundsdóttur söngkonu með því að nefna samloku á matseðlinum í höfuðið á henni. Samlokan ber nafnið „The Bjork.“
Bjarkarsamlokan inniheldur tómata, avókadó, kóreskt kimchi, spírur, grænmeti og sterkt majónes og er að sögn íslenska ferðamannsins hið mesta hnossgæti.
Björk er þó ekki eina stórstjarnan sem fær samloku nefnda í höfuðið á sér því á matseðlinum má einnig sjá samlokurnar Mariuh Carey, Fionu Apple, Whitney Houston, Britney, Gwen, Stevie, Dolly og Robyn.
„Við nefndum samlokurnar okkur í höfuðið á uppáhaldssöngkonunum okkar og skrifuðum svo hverri og einni hjartnæmt aðdáandabréf,“ segir Facebook-síðu staðarins, Breadhive Bakery & Café. Þá kemur fram að Britney Spears hafi verið sú fyrsta til að senda svar til baka en ekki fylgir sögunni hvort Björk hafi brugðist við bréfinu.
DV hefur áður haft afspurn af matartengdum tilvísunum í Björk og var fyrir nokkrum árum starfrækt kaffihús í Ástralíu sem hét einfaldlega Björk, með vísan í söngkonuna. Hins vegar er óvitað hvort söngkonan hafi verið matgerð með þessum hætti fyrr, þótt hún hafi margoft verið heiðruð við hin ýmsu tilefni; til dæmis í söfnum úti um allan heim sem og hjá tískurisanum Gucci.