Það að borða meira grænmeti og minna kjöt er lykillinn að því að lifa lengur ef miða má við niðurstöður nýrrar rannsóknar. Samkvæmt þeim eru 16% minni líkur á að fólk fái hjartasjúkdóma og 25% minni líkur á ótímabærum dauða ef fólk heldur sig eingöngu við grænmetisfæði eða mataræði þar sem meira magns grænmetis er neytt en kjötafurða.

Niðurstöður rannsóknarinnar hafa verið birtar í ritinu Journal of the American Heart Association. Casey Rebholz, aðalhöfundur rannsóknarinnar, segir að niðurstöðurnar styrki fyrri niðurstöður um að það sé gott fyrir heilsu hjartans að borða mikið grænmeti og dragi úr líkum á ótímabærum dauða. Með grænmeti telja vísindamenn ávexti, heilhveiti, belgjurtir og hnetur að hennar sögn. Undir kjötflokkunina fellur auðvitað kjöt, egg, mjólkurvörur og sjávarfang.

12.168 miðaldra Bandaríkjamenn tóku þátt í rannsókninni. Í henni var horft til hversu oft þátttakendurnir borðuðu grænmeti en ekki var gerð krafa um að þátttakendur útilokuðu kjöt úr mataræði sínu. Heilsufar þátttakenda frá 1987 til 2016 var rannsakað. Enginn þeirra var með hjartasjúkdóma í upphafi rannsóknarinnar. CNN skýrir frá þessu.