Kanadíski viðskiptajöfurinn Kevin O’Leary, sem er hvað þekktastur fyrir að vera dómari og fjárfestir í raunveruleikaþáttunum Shark Tank, segir í viðtali við CNBC að hann eyði þúsund dollurum, rétt tæplega 125 þúsund krónum, á dag í mat. Þetta hljómar vissulega eins og glapræði og bissnessmaðurinn er algjörlega meðvitaður um það.
„Ég er slæm fyrirmynd þegar kemur að því hvað ég eyði miklu í mat á mánuði,“ segir hann.
Þessi mikli matarkostnaður á hverjum degi helgast af því að Kevin þarf oft að bjóða fólki út að borða vegna vinnunnar, sem og kaupa vín með matnum. Hann vill borga fyrir það sjálfur.
„Ég vil ekki skulda neinum neitt,“ segir hann. „Ég vil endilega borga reikninginn. Ég geri það oftast,“ bætir hann við. Þess má geta að um morguninn áður en viðtalið var tekið var Kevin búinn að eyða tvö hundruð dollurum, tæplega 25 þúsund krónum, í morgunmat.
Kevin varð milljarðamæringur þegar að fyrirtækið Mattel keypti hugbúnaðafyrirtæki hans, The Learning Company, árið 1999. Hann segist reyna að borða hollt og það útskýri einnig háan matarreikning. Í viðtalinu við CNBC segir hann að venjulegt fólk, sem þéni ekki milljónir, ætti aldrei að eyða meira en tuttugu prósent af útborguðum launum í mat á veitingastöðum. Þá mælir hann með því að fólk borði heima fjóra til sex daga vikunnar með það að markmiði að eyða aðeins tíu prósent af útborguðum launum á veitingastöðum og börum.