Joe Nicchi er eigandi ísbúðarinnar CVT Soft Serve í Los Angeles, en búðin er í vagni og afar vinsæl. Hann er orðinn ansi hreint pirraður á svokölluðum áhrifavöldum og hefur tekið til sinna ráða. Hann tilkynnti það í vikunni að áhrifavaldar, þá sérstaklega þeir sem reyndu að betla ókeypis ís í staðinn fyrir auglýsingu, þyrftu að borga helmingi meira en hinn almenni kúnni fyrir ísinn.

Í samtali við VICE segist Joe oft fá beiðnir um að redda ís fyrir áhrifavalda án endurgjalds. Hann nefnir sérstaklega eitt atvik sem gerðist í síðustu viku þegar hann var beðinn um að sjá um teiti fyrir þrjú hundruð manns gegn kynningum á samfélagsmiðlum.

„Það var kornið sem fyllti mælinn. Ég get ekki gert það. Ég get ekki unnið frítt,“ segir hann. Í framhaldinu setti hann skilti á vagninn sinn þar sem segir: Áhrifavaldar borga tvöfalt. Hann segir að í fyrstu hafi þetta verið ætlað sem grín en þegar að mynd af honum að halda á skiltinu varð vinsæl á netinu varð hann að standa við stóru orðin.

https://www.instagram.com/p/BzdmrOJpTmI/

„Trúiði mér, ég fatta kaldhæðnina í því að ég geri grín að áhrifavöldum. Núna fæ ég mikla athygli á samfélagsmiðlum fyrir að hafa áhrif á þá sem eru ekki áhrifavaldar,“ segir hann við VICE.