Ef það er eitthvað sem er alltaf hægt að tala um í þjóðfélaginu þá er það stjórnmál, matur og veðrið. Samræður um veðrið endast yfirleitt ekki lengur en í 48 sekúndur þannig að heppilegt er að sameina það fyrrnefnda, mat og stjórnmál.
Við spurðum okkur hvaða matur það væri sem lýsir hverjum flokki best og eftir mikla rannsóknarvinnu er niðurstaðan komin.
Sjálfstæðisflokkurinn elskar grillkjöt eins og Hannes Hólmsteinn orðaði í Kastljósi hér um árið:
„Sjálfstæðismenn eru menn sem vilja græða á daginn og grilla á kvöldin.“
Viðreisn er flokkurinn sem borðar afgangana úr ísskápnum og það er bara allt í góðu með það. Þeir eyða minna í innkaup og oftar en ekki verður til einhver dýrindis máltíð úr afgöngunum.
Miðflokkurinn er flokkurinn sem nýtir hlaðborð til hins ýtrasta, alltaf fyrstir á staðinn og síðastir út. Ef það er eitthvað sem skiptir Miðflokkinn máli eins og hlaðborð eða orkupakki þá gefur flokkurinn ekki auðveldlega eftir.
Það er margt líkt með Pírötum og svörtu Doritos snakki. Píratar eru sterkir eins og svart Doritos en flokkurinn gengur í gegnum erfiðleika þessa dagana rétt eins og snakkið sem virðist hafa týnt bragðinu.
Samfylkingin er algjört biscotti kex. Flokkurinn er harður og stendur á sínu og þegar þú býður þeim síðan að kíkja í kaffi er oft auðveldara að ræða málin.
Flokkur Fólksins er algjör brauðterta. Það eru eflaust margir sem muna eftir því þegar Flokkur fólksins bauð upp á magnaða brauðtertu í kosningakaffinu sínu. Brauðtertan var hríseysk og toppuð með túnfiski og frönskum kartöflum.
Það voru eflaust margir sem kusu Vinstri Græn í síðustu kosningum því þeir hugsuðu með sér að þarna væri flokkur sem myndi draga Alþingi meira til vinstri og vinna gegn Sjálfstæðisflokknum. Margir urðu eflaust vonsviknir þegar flokkurinnn fór í samstarf með Sjálfstæðiflokknum. Þess vegna er flokkurinn eins og pizza með vitlausum áleggjum. Þegar maður pantar pizzu með pepperoni þá vill maður ekki fá pizzu með ansjósum og gráðosti.
Framsóknarflokkurinn er mikið fyrir íslenskan landbúnað og því er það augljóst að flokkurinn er íslenskt lambalæri. Eflaust er lambalærið síðan kryddað með íslensku blóðbergi og bláberjum sem eru tínd úti í móa.
Hvað finnst þér lesandi góður? Er þetta rétt túlkað eða hefðirðu viljað sjá eitthvað öðruvísi?
Endilega skrifaðu athugasemd hér fyrir neðan ef þér finnst einhver annar matur henta stjórnmálaflokkunum betur.