Miðstöð sjúkdómavarna og forvarna í Bandaríkjunum, CDC, birti á dögunum athyglisverða mynd á Facebook-síðu sinni.
Við fyrstu sýn virðist myndin vera af nokkuð girnilegri bollaköku, eða múffu, með sesamfræjum. Þegar betur er að gáð má finna minnst fimm pöddur á múffunni, svokallaða blóðmítla (e. ticks).
Markmiðið með færslunni, að sögn CDC, var að vekja Bandaríkjamenn til umhugsunar um blóðmítla nú þegar sumarleyfin eru á næsta leiti. Mítlarnir virðast geta leynst víða og eru matvæli ekki undanskilin þar. Mítlunum á þessari mynd tekst að fela sig nokkuð vel innan um sesamfræin.
Eðlilega vakti myndbirtingin athygli á Facebook og voru sumir óhressir með CDC vegna hennar. „Takk fyrir að eyðileggja múffurnar fyrir mér. Nú mun ég aldrei geta borðað þær aftur,“ sagði til að mynda einn notandi.
Að sögn CDC er hættan mest á að verða bitinn á tímabilinu frá apríl og fram í september. Mítlarnir leynast víða en kunna nokkuð vel við sig í grasi og á skógi vöxnum svæðum.