Þann 21. júlí næstkomandi eru þrjátíu ár liðin síðan rómantíska gamanmyndin When Harry Met Sally var frumsýnd í heimalandi sínu. Öruggt er að segja að aldeilis verði fagnað þriðja tugnum í New York, nánar til tekið á veitingastaðnum sem kvikmyndin gerði stórfrægan.
Flestir sem hafa séð eða þekkja til myndarinnar ættu að kannast við klassísku senuna þar sem leikkonan Meg Ryan (í hlutverki Sally) gerir sér upp fullnægingu á opnum vettvangi. Atriðið á sér stað á veitingastaðnum Katz‘s Delicatessen en veitingastaðurinn stendur enn í borginni og dafnar vel.
Til að fagna þrítugsafmæli myndarinnar ætla eigendur veitingastaðarins að efna til keppni í gervifullnægingum. Þar mun fólk keppa sín á milli og kalla fram ýmsar stunur og leikgerð í takt. Besta gervifullnægingin verður svo valin af sérstakri dómnefnd. Ekki er þó búið að gefa upp hver sigurverðlaunin verða.
Eigendur eru sagðir vera gríðarlega ánægðir með tengingu myndarinnar við staðinn og það langa líf sem umrædda atriði hefur átt. Síðar í júlímánuði verður svo haldin sérstök sýning á myndinni, þar sem í boði hússins verða réttir sem helstu persónurnar sjást gæða sér á.
Kvikmyndin, sem Rob Reiner leikstýrði, sló rækilega í gegn á sínum tíma og hlaut einróma lof gagnrýnenda. Myndin var tilnefnd til Óskarsverðlauna fyrir besta handritið og gerði einnig stórstjörnur úr leikurunum Billy Crystal og Meg Ryan.
Senuna sígildu má sjá að neðan.