Nýjar auglýsingar frá veitingastaðnum Pítunni hafa vakið talsvert umtal, en um er að ræða auglýsingar fyrir svokölluð pítupartí á staðnum.
Auglýsingarnar hafa gengið í nokkra daga í sögu á Instagram-síðu Pítunnar en í stuttum myndbrotum sést fyrst annað hvort kona eða karl og hægt og rólega koma svo pítur fyrir augun á þeim.
Umræða hefur skapast um auglýsingarnar í hópnum Markaðsnördar á Facebook og sitt sýnist hverjum. Sumum finnst þetta snilld – aðrir botna ekkert í auglýsingunum.
„Þetta er kennslumyndband „Hvernig auglýsir þú mat og klúðrar því“,“ skrifar einn markaðsnörd og annar skrifar hins vegar: „Fyrst þið eruð að tala um það er þetta greinilega að virka! Auglýsing beint í mark!“
Þá telja einhverir auglýsinguna vera bráðfyndna án þess að leggja mat á hvort hún sé líkleg til að æsa upp hungrið í fólki.
„Loksins einhver sem þorir að gera eitthvað fyndið.“
Dæmi um auglýsingu frá Pítunni má sjá hér fyrir neðan:
