Það er alveg nauðsynlegt að hafa eitthvað gott á boðstólum til þess að nasla á meðan horft verður á Eurovision á laugardagskvöldinu. Algengt er að margir hittist saman og getur mataræði fólks verið mismunandi. Góður gestgjafi passar sig vel og vandlega á því að hafa eitthvað fyrir alla og ákváðum við því að finna þrjár góðar uppskriftir sem ættu að henta þeim sem eru á ketó, þeim sem eru vegan og svo þeim sem borða hvað sem er. Uppskriftirnar eru einfaldar, taka stuttan tíma að útbúa en eru allar svo bragðgóðar að enginn ætti að fara ósáttur heim eftir partíið.
Hanna Þóra Helgadóttir, bloggari á síðunni fagurkerar.is, hefur verið dugleg að prófa sig áfram með alls konar ketó-uppskriftir sem hún er dugleg að birta á Instagram-síðu sinni: hannathora88
Innihald:
Rifinn mozzarella-ostur
Himalaja-salt
Hvítlauksduft
Aðferð:
Mozzarella-ostinum er dreift í stærð munnbita á bökunarpappír, smá himalaja-salti er dreift yfir ásamt örlitlu hvítlauksdufti. Osturinn er bakaður við 200°C þar til hann er orðinn gullinn og stökkur. Þá er platan tekin út og ostinum leyft að kólna þar til hann verður alveg stökkur.
Tilvalið er að bera ostasnakkið fram með lárperumauki (guacamole).
Edamame-baunir eru virkilega góðar og einfaldar til framreiðslu. Þær innihalda mikið prótein og eru því ekki bara ljúffengar heldur hollar líka.
Innihald:
Edamame-baunir
Maldon-salt
Krydd eftir smekk
Aðferð:
Byrjið á því að sjóða edamame-baunirnar í belgnum þar til þær hafa náð góðri mýkt. Sigtið vatnið frá baununum og setjið þær á pönnu ásamt ólífuolíu og steikið þar til þær verða örlítið stökkar.
Berið baunirnar fram í belgnum og stráið maldon-salti yfir ásamt því kryddi sem ykkur þykir gott. Baunirnar eru svo borðaðar úr belgnum og honum hent.
Blaðakona á ritstjórn lofar því að enginn verði svekktur á þessari einföldu en bragðgóðu uppskrift:
Innihald:
Rjómaostur
Laukur
Paprika
Sweet chili-sósa
Snakk eða kex eftir smekk
Aðferð:
Áður en hafist er handa skiptir miklu máli að þrífa hendurnar vel eða vera í einnota hönskum. Rjómaosturinn er tekinn og settur í skál. Laukur og paprika eru skorin niður í litla bita og fer magnið eftir smekk hvers og eins. Grænmetinu er svo hnoðað vel saman við ostinn og í kjölfarið sett ofan í skál sem bera á réttinn fram í. Þá er tekin sweet chili-sósa og henni hellt yfir ostinn. Þetta er svo borið fram með því snakki eða kexi sem hverjum og einum finnst gott. Gott er að taka sweet chili-sósuna með á borðið því reynslan sýnir að flestum þykir gott að bæta á hana jafnóðum.