Allt að 67% verðmunur var á páskaeggjum mill verslana í verðkönnun sem verðlagseftirlit ASÍ framkvæmdi 11. apríl. Munurinn á hæsta og lægsta verði nam oft mörg hundruð krónum og mest 1.400 krónum á einu og sama páskaegginu.
Bónus var oftast með lægstu verðin á páskaeggjum eða í 28 af 30 tilfellum. Super 1 var oftast með hæstu verðin eða í 13 tilfellum af 30 en Iceland fylgir fast á eftir með hæstu verðin í 11 tilfellum. Lítið úrval var af páskaeggjum í Kjörbúðinni en einugnis 7 páskaegg af 30 voru fáanleg í búðinni. Engin páskaegg voru til í Costco.
Verðmunurinn var mestur á litlum rís páskaeggjum frá Freyju, fjórum saman í pakka eða 67% en lægst var verðið í Bónus, 359 krónur en hæst í Hagkaup 599 krónur. Í krónum talið var verðmunurinn mestur á Nóa Siríus risa páskaeggi, 1.401 krónur eða 25%. Lægst var verðið í Bónus 5.598 krónur en hæst var verðið 6.999 krónur í Super 1. Þá var 28% munur á hæsta og lægsta verði á Nóa Siríus eggi númer 7. Lægst var verðið í Bónus, 3.579 krónur, en hæst, 4.599 krónur í Super 1 en það gerir 1.020 krónu verðmun.
Fleiri matvörur voru kannaðar í sömu könnun, en lesa má meira um hana með því að smella hér.