Fjölmiðlakonan Edda Sif Pálsdóttir hefur heldur betur slegið í gegn á Twitter með myndum úr matreiðslumöppunni Nýir eftirlætisréttir sem var gefin út einhvern tímann á síðustu öld af Vöku-Helgafelli. Um var að ræða matreiðsluklúbb sem var afar vinsæll á sínum tíma.

Matreiðslumöppuna kannast margir við, en Edda Sif bendir á að hugsanlega séu sumar uppskriftirnar betur geymdar í minningunni.

„Hey! Vissuði að uppskriftir eldast skuggalega illa? Missti matarlistina fyrir lífstíð yfir mysulúðunni með spagettíinu,“ tístir Edda Sif, en skrifin hafa uppskorið rúmlega 160 læk á samfélagsmiðlinum.

Hey! Vissuði að uppskriftir eldast skuggalega illa?
Missti matarlistina fyrir lífstíð yfir mysulúðunni með spagettíinu ?? pic.twitter.com/7BDN1gdUD1

— Edda Sif Pálsdóttir (@EddaSifPalsd) April 10, 2019

Með skrifunum birtir Edda Sif myndir af hvunndagsrétti með ananas og salthnetum, léttsoðinni lúðu með eplum og spagettíi og skinkuforrétti með eggjum og graslauk. Alþingiskonan Þorgerður Katrín Gunnarsdóttir leggur orð í belg og spyr hvort Edda Sif hafi rætt þetta mál við matgæðinginn Jóhönnu Vigdísi. Ingvi Þór Sæmundsson skrifar einfaldlega: „Matreiðslubók æsku minnar,“ og því er Edda Sif sammála.

„Sama hér. Þetta er Eva Laufey mæðra okkar.“

Einn fylgjandi Eddu Sifjar á hins vegar vondar minningar af þessari matreiðslubók.

„Þessi mappa… núna skil ég aðeins betur afhverju mér fannst nánast allt mjög vont þegar ég var barn, „matarmenning“ á Íslandi var vægast sagt hræðileg.“