Maður á Havaí var nýlega dæmdur fyrir að stela bíl, en refsingin er ansi áhugaverð. Hann má ekki drekka sinn uppáhalds gosdrykk næstu fjögur árin á meðan hann er á skilorði. Sagt er frá þessu hjá fréttaveitunni AP.
Christopher Montilliano Jr. er 21 árs gamall og laug að lögreglu þegar hann var handtekinn á Maui í júní síðastliðnum í stolna bílnum. Hann sagði lögregluþjónum að frændi hans hefði leyft honum að keyra bílinn og að hann væri á leiðinni að kaupa gosdrykki.
Dómaranum blöskraði þessi ósvífni Christophers og bannaði honum að drekka Pepsi í fjögur ár eftir að hann sagði það vera sinn eftirlætis gosdrykk.
Christopher eyddi sjö dögum í fangelsi eftir handtökuna, en var jafnframt dæmdur til að vinna hundrað klukkustundir í samfélagsvinnu og greiða hundrað dollara, rúmlega tólf þúsund krónur, í sekt.