Kryddið kóríander er alls ekki fyrir alla og virðist fólk skiptast í fylkingar. Annað hvort elskar það eða hatar kóríander. Það er hins vegar góð ástæða fyrir því að sumt fólk getur ekki borðað kóríander og finnst það minna á sápu frekar en mat.
Næringarfræðingurinn Monica Auslander Moreno segir nefnilega í samtali við Women‘s Health að hatrið á kóríander sé genatískt.
„Genin sem ákvarða lyktarskyn fólks eru mjög viðkvæm hjá sumum einstaklingum og því finna þeir sápulykt af kóríander,“ segir hún.
Í greininni kemur einnig fram að hugsanlega geti umhverfi ákvarðað ástæðu þess að sumir þoli ekki kóríander þar sem aðeins 3% þeirra sem búa í Mið-Austurlöndum geta ekki borðað kóríander á meðan sú tala er 21% í Austur-Asíu.