Ungur karlmaður sem ekki hefur greint frá nafni sínu tók upp á því um helgina að borða hrátt svínshöfuð þegar hann mótmælti vegan hátíð.
Uppákoman þykir virkilega viðbjóðsleg og sögðu viðstaddir að maðurinn hafi komið mörgum börnum sem og fullorðnu fólki í uppnám. Skipuleggjendur hátíðarinnar sögðu að meira að segja fólk sem borðar kjöt að staðaldri hafi þótt uppákoman ógeðsleg.
Hátíðin sem kallast VegFest var haldin í Brighton um helgina og gerðu skipuleggjendur hennar ráð fyrir því að um þrjátíu manns myndu mæta og mótmæla. Það kom þeim því á óvart þegar aðeins þrír einstaklingar mættu til mótmælanna.
„Það voru bara þrír sem mættu sem var sorglegt fyrir mótmælendurna,“ segir einn af skipuleggjendum hátíðarinnar í samtali við Metro. „En það stoppaði þá þó ekki í því að halda áfram að koma börnum og öðrum í uppnám og að lokum kom lögreglan og lét þá fara.
„Það sem var áhugavert var að það var fólk þarna sem borðar vanalega kjöt en þeim fannst uppákoman svo viðbjóðsleg að þeir sögðu að hún hafi hvatt þá til þess að hætta að borða kjöt. Svo það lítur allt út fyrir það að mótmælendur veganisma hafi í raun hvatt fólk til þess að verða vegan.“