Franskar kartöflur eru vinsælar, annað hvort sem meðlæti eða bara þegar að hungrið sverfir að. Einhverjir kjósa að nota kartöflukrydd á franskarnar á meðan aðrir láta sér salt nægja. Nú er hins vegar búið að kynna alveg glænýja leið til að krydda franskar sem gæti breytt lífi þínu.

Claire Lower hjá vefsíðunni Lifehacker er nefnilega búin að uppgötva frábært frönskukrydd eftir að hún fékk sér franskar í Hong Kong sem eru kryddaðar með kryddinu sem fylgir skyndinúðlum.

Kryddið sem fylgir skyndinúðlum á vanalega að fara í soðið sem núðlurnar eru soðnar í, en Claire er búin að komast að því að það að krydda franskar með þessari kryddblöndu er algjörlega ómótstæðilegt.

„Þetta er svo einföld en augljós blanda. Sem aðdáandi bæði MSG og að krydda mat með skyndinúðlukryddi, þá er ég hneyksluð á sjálfri mér að hafa ekki prófað þetta fyrr,“ skrifar hún.