Hunang er mikið notað í matargerð enda gefur það hinum ýmsu réttum sætt bragð. Hins vegar getur hunang verið til margra annarra hluta nytsamlegt.
Hunang er rakagefandi frá náttúrunnar hendi þar sem sykurmólekúlin binda vatnið í húðinni. Það er til dæmis þjóðráð að blanda saman hunangi, haframjöli, púðursykri og sítrónusafa til að búa til heimagerðan handaskrúbb.
Hunang getur einnig hjálpað í baráttunni við leiðigjarnan hósta þar sem náttúrulega sætan í hunangi getur virkað jafn vel og hóstasaft. Fáið ykkur tvær matskeiðar af hunangi fyrir svefninn til að lina hóstaköstin og hjálpa ykkur við að ná betri svefn. Þá er einnig þjóðráð að bæta smá hunangi út í teið þegar að flensan lætur á sér kræla.
Þótt ótrúlegt megi virðast á hunang einnig heima í baðherberginu, innan um sápu og næringu. Hunang veitir nefnilega ekki aðeins raka heldur getur einnig drepið bakteríur sem valda bólum og líkamslykt. Til að búa til einfalda líkamssápu er tveimur matskeiðum af hunangi einfaldlega blandað saman við eina matskeið af ólíufolíu. Hægt er að breyta sápunni í skrúbb með því að blanda hálfum bolla af púðursykri saman við. Munið svo að geyma blönduna í lofttæmdum umbúðum þar til hún er notuð.
Rannsóknir hafa sýnt fram á að dagleg neysla á hunangi í litlu magni getur verið góð fyrir kólestórólið.
Hunang er, eins og áður segir, gott í baráttunni við bólur. Það er tilvalið að blanda saman hunangi og múskati í jöfnum hlutföllum og bera á bólur. Leyfið blöndunni að hvíla á svæðinu í tuttugu mínútur og þvoið hana síðan af.
Hunang er ekki aðeins gott við hósta heldur getur einnig virkað sem bakteríueyðandi. Þannig er gott fyrir þá sem eru með særindi í hálsi að fá sér drykk sem samanstendur af heitu vatni, engifer, sítrónusafa og hunangi. Enn betra er að velta blöndunni um í munninum áður en henni er kyngt.
Blandið tveimur matskeiðum af hunangi saman við tvo bolla af volgu vatni og berið það í hárið eftir að þið eruð búin að þvo það. Leyfið hunangsblöndunni að virka í um hálftíma og skolið hana síðan úr. Hárið verður endurnært, endarnir betri og hárið heilt yfir sterkara.
Hunang virkar vel við vægum brunasárum. Er það einfaldlega borið á brennda svæðið og látið vera þar til bólgur hjaðna.
Hunangsvatnið sem við minntumst á áðan getur einnig virkað vel í baráttunni gegn flösu. Hunang er sveppaeyðandi og gefur hársverðinum raka þannig að gott er að nudda hunangsvatninu vel í hársvörðinn áður en það er skolað úr.