Kaffihúsið Pallett í Hafnarfirði hefur bryddað upp á nýjung alla virka daga frá klukkan 8 til 12. Forsvarsmenn kaffihússins leggja niður allar verðskrár á þeim tíma og hvetja viðskiptavini til að borga það sem þeim sýnist fyrir veitingarnar.

„Við erum mjög lítið fyrirtæki og búum til allt frá grunni hér á staðnum, þannig að við treystum á örlæti ykkar,“ stendur í tilkynningu á Facebook-síðu staðarins.

„En við höfum einnig ástríðu fyrir sanngirni og að allir séu velkomnir, þannig að það eina sem við biðjum um er að þið borgið það sem ykkur finnst sanngjarnt,“ stendur enn fremur.

Aðeins er rétt um klukkutími síðan að tilkynningin fór í loftið á Facebook og eru lækin byrjuð að hrannast inn.

„Fallegt,“ skrifar einn fylgjandi kaffihússins og margir smella hjörtu við færsluna.