Það hefur færst í aukana síðustu ár að stjörnurnar taki með sér snarl á verðlaunahátíðir, enda afar langar athafnir. Hér eru nokkur ógleymanleg móment.
Leikkonan Melissa McCarthy mætti með fjörutíu skinkusamlokur á Golden Globe-hátíðina í ár.
„Ég er búin að gefa öllum þær. Ég kem með pylsur á næsta ári,“ sagði hún á hátíðinni.
Crazy Rich Asians-stjarnan Gemma Chan mætti á nýafstaðna Óskarsverðlaunahátíð í skærbleikum kjól. Kjóllinn var vel búinn með djúpum vösum og nýtti Gemma þá út í ystu æsar. Hafði hún smá- og hrískökur í vösunum af góðri ástæðu.
„Þetta er löng athöfn,“ sagði hún á rauða dreglinum. „Maður fær ekki kvöldmat!“
This Is Us-krúttið Mackenzie Hancsicsak mætti á Screen Actors Guild-verðlaunahátíðina í janúar í ár með skátakökur. Seldi hún stjörnunum kökur og endaði á því að græða fimm hundruð dollara, eða tæplega sextíu þúsund krónur, þetta kvöld.
Spjallþáttadrottningin Ellen DeGeneres sló rækilega í gegn sem kynnir á Óskarnum árið 2014 þegar hún gaf hungruðum stjörnum pítsusneiðar á miðri hátíð.
„Pítsan er komin,“ sagði hún er hún gekk um salinn með pítsusendlum. Stjörnur á borð við Juliu Roberts og Brad Pitt nældu sér í sneið.
Jimmy Kimmel fetaði í fótspor Ellenar á Óskarsverðlaununum árið 2017 þegar hann lét sleppa litlum fallhlífum sem voru fylltar af nammi og smákökum. Árið eftir dreifði hann nestisboxum með snakki og öðru góðgæti í. Þegar að Jimmy kynnti Emmy-verðlaunin árið 2016 fékk hann móður sína Joann til að útbúa rúmlega sjö þúsund samlokur með hnetusmjöri og sultu fyrir galagestina.
Grínistinn Chris Rock fékk vini dóttur sinnar til að hjálpa sér á Óskarnum árið 2016 og fékk þær til að ganga um salinn með smákökur til sölu. Allt í allt græddu vinirnir tæplega átta milljónir króna á athæfinu.