Kona lést eftir að hafa borðað á veitingastaðnum RiFF í Valencia á Spáni, en staðurinn er með Michelin-stjörnu. Að minnsta kosti 23 veiktust eftir að hafa borðað á veitingastaðnum samkvæmt frétt The Telegraph.
Konan sem lést hét María Jesús Fernández Calvo og var 46 ára. Hún lést á sunnudagsmorgunn eftir að hafa kastað upp og verið með heiftarlegan niðurgang. Hún borðaði á RiFF ásamt eiginmanni sínum og syni þeirra og voru að halda upp á afmæli þess fyrrnefnda síðastliðinn laugardag. Eiginmaðurinn og sonurinn eru meðal þeirra 23 sem hafa veikst eftir heimsókn á staðinn.
María pantaði hrísgrjóna- og svepparétt á veitingastaðnum. Fyrstu fréttir staðhæfðu að um eitraða sveppi hefði verið að ræða en það hefur ekki verið staðfest.
Spænska dagblaðið El Pais segir að veitingastaðurinn verði lokaður þar til dánarorsök konunnar hefur verið úrskurðuð.